حكاية بنت من ليبيا من هنا
حكاية بنت من ليبيا
حكاية بنت ليبية تحكي الخوها والبوها ولخطيبها وللناس وهما الاربعه ايردو عليها ,,,ياخوي ارحمني يابوي عليا ماتلوم , يااللي خاطبني سيبني مافيه قسوم والناس بقسوتها تحكم وانا المضيوم , وانا مش بيدي ولا ذنبي جا طير البوم ركبني الذلة و العلة مقدر محتوم , ضيع احلامي وايامي وجافني النوم واللي ذابحني وحارقني نظرات اللوم , ياريت انخش في غيبوبه ولا في ديموم ياريت ربي ايريحني وياخذني اليوم , وحسبي الله وحسبي الله .
ايرد عليها خوها ,,,
ماتدرفي ياخيه ماتدرفي دمعك ايعز عليا وحسيبك الله
ماتدرفي ياخيه كيف الدهب صافي نقي معيارك
ومانك اللي دونيه والعيب ماهو فيك في غدارك
ودوبين عيني حيه مانسيبة نغسل بدمة عارك
يشهد الله عليا نسعي نهار وليل ناخد ثارك
والعهد بيك قويه بالقرب مالرحمن طفي نارك
انت دوم في عليه وناخوك ماتنزل فيوم اقدارك
وحسيبك الله ,,
وايرد عليها بوها ,,,
ماتدرفي يابنيه ماتدرفي دمعك ايعز عليا وحسيبك الله
ناما عليك انلوم , ناطيرا جريح ايحوم
ناما لقيت اعزوم , اللي صارلك في القلب دار اختوم
مالنوم نا محروم , غريق في بحر ماقدرت فيه انعوم
انعدك شهيده كيف خوك اليوم , فدا ليبيا دفعتوه عالي السوم
والدنيا هبا ما حال فيها ايدوم , وين النجا من دعوه المظلوم
وياالله ياالله يا جلاي كل هموم اتكحل اعيوني بشوفته معدوم
وحسيبك الله ,,
ايرد عليها خطيبها ,,,
مانسيبك يابنيه مانسيبك وارضيت بالقسميه وحسيبك الله
حطي ايديك في ايدية ننسوه هللي صار بالجمليه
وماتجيك مني سيه فيت الطرب والفرح والحنية
وتمشي علي هدي الحبيب نبيه اتصونيه ودي اتكثري الذرية
انعيشو الحياة في نسوم هالحريه وتبقي عمار بلادنا وهنيه
وحسيبك الله ,,
ايردوا عليها الناس ,,,
يابنت ياليبيه عليك ماقسيت وانت اليوم ضحية وحسيبك الله
بالدمع ماتنهالي وماتسكتي واحكي بصوتا عالي
انت عفتك في الروح ماهي في جسما بالي
نقدم النفس فداك قبل المالي تاجا علي راسي انحطك عالي
ويحرم عليا النوم مايلفالي ورغد الحياه والعيش مايهنالي
واللي جرا يابنت ردا حالي ونارك معايا واقده شعالي
ماتنطفي لا فيوم يهدا بالي فجرت عدوك رايده بقتالي
نخليه دما في الوطا شتوالي وناخد بثارك وثار كل عيالي
وحسيبك الله وحسيبنا الله كلنا
